കിനാവുകള്‍ പറയുന്നത്..!

പൂക്കളാണെന്റെ കിനാവുകള്‍.
ആര്‍ക്കുവേണ്ടിയും കാത്തുനില്ക്കാതെ
വിടരും, കൊഴിയും, പിന്നെയും വിടരും
പൂക്കളാണെന്റെ കിനാവുകള്‍...!

മഴമേഘമാണെന്റെ കിനാവുകള്‍.
ചാറ്റല്‍ മഴയായ് പൊഴിയും, കൊടും
പേമാരിയായ് പെയ്തൊഴിയും
മഴമേഘമാണെന്റെ കിനാവുകള്‍...!

സുസ്മിതങ്ങളാന്റെ കിനാവുകള്‍.
അപരഹൃദയത്തിനാത്മാവിലോളം
അമൃത് തൂകിക്കടന്നു പോകും
സുസ്മിതങ്ങളാണെന്റെ കിനാവുകള്‍...!

കിനാവുകള്‍ പറയുന്നത്;
“ഞാന്‍ നിന്റെ രാഗഭാവം
ഞാന്‍ നിന്റെ ജീവതാളം
നമ്മള്‍ പരസ്പരം ബന്ധിതര്‍
കാല പ്രവാഹത്തില്‍ ഒന്നിച്ചുചേര്‍ന്നവര്‍...!”

തിരക്ക്

അവന്റെ തമാശ കേട്ട് അവള്‍ ചിരിച്ചു കൊണ്ടിരുന്നു.
ഒടുവില്‍, വര്‍ഷമൊന്നു കഴിഞ്ഞതോ അവളുടെ വയറ്റില്‍
മറ്റൊരു തമാശ രൂപം കൊള്ളുന്നതോ അവന്‍ അറിഞ്ഞില്ല.
അവന്‍ തിരക്കിലായിരുന്നു; വിവാഹം കഴിക്കുന്ന തിരക്കില്‍!